你記得嘅大埔

我哋讀咗廿幾宗政府檔案處嘅大埔案卷：船灣淡水湖搬村、大埔墟填海、工業邨、廣福邨、大埔滘火車站…… 但檔案係政府嘅記錄。村民、街坊、工人、漁民嘅聲音，只有經官員轉述先入到檔案，好多時連中文原件都冇留低。

所以我哋想請親身經歷過嘅人，講返檔案入面冇寫低嘅嘢。

我哋特別想聽

• 船灣淡水湖興建時搬出嚟嘅家庭（六鄉、三門仔），同佢哋嘅後人
• 1950 至 70 年代喺大埔墟海旁、舊墟、太和市生活或者做生意嘅人
• 1983 年起入伙嘅廣福邨、宏福苑第一代住戶
• 大埔工業邨頭十年嘅廠商同工人
• 喺吐露港打魚、住艇嘅人，同埋填海前嘅海邊記憶
• 搭過大埔滘火車站、渡輪去西貢北嘅人
• 參與過大埔節、龍舟嘅人

訪問點做

• 時間地點由你揀：你屋企附近、茶樓、公園都得，大約一至兩個鐘。
• 經你同意先會錄音；唔想錄音，我哋可以只做筆記。
• 你可以用真名、化名，或者完全唔具名。
• 做完會畀你睇返摘要，你話唔啱嘅地方我哋會改。
• 任何問題都可以唔答，隨時可以叫停；之後改變主意，都可以撤回。
• 訪問內容點用（淨係研究、導賞團限定內容、定公開），會喺同意書入面逐項問你，你揀先算。